Oleh Helmi Adam.
Minah, Naim, dan sadih, ude hampir seminggu makan ame peda diperban, dan daging ikan peda ude mulai menyusut, tinggal tulang. Padahal ikan pedanya ude di bolak balik, dari side A ke side B, istilah orang dulu yang menggunakan kaset. Anak mude sekarang mungkin ngak ngerti, kalu kaset itu ape. “Tapi waktu yang ditunggu untuk dapet gaji lame amat ye” dumelan minah dalem ati. Ntu sebabnye minah paling benci ame libur, karene kalu libur, die ngak dapet duit harian dari om ami. Biasenye kalu kerje di rumeh om ami, suka dikasih 10 rbu sampe 20 Rebu. Kalu dari koh acong, kadang kadang aje, kalu die lagi seneng dikasih, tapi kalau lagi mareh mareh. boro boro dikasih duit, dimaki, iye. Kenang minah dalam hati.
Akhirnye hari yang ditunggu tibe, tanggal 10 juni 2019, saat semue masuk kerje. Minah dengan semangat 45, die udeh siap dari subuh. Jam menunjukkan diangka 6.30, mineh berangkat ke rumah boh acong, mau kerje. Namum tepat di depan rume koh acong, ternyate rame be-eng. Kaye lagi suasane duka. Minah langsung aje dag digdug, takutnye koh acong meninggal dunie, dan gajinye nggak dibayar. Die cepet cepet masuk rume, dan ternyate, bener dugaan mineh, ade nyang meninggal dunie, Kemudian mineh lihat sosok orang nyang baru keluar dari kamar, "Alhamdulillah” dalam hati minah, koh acong mash hidup, “terus yang meninggal siape ye..?” tanye minah dalam hatinye.
Ternyata setelah koh acong nangis Bombay, (eh saleh nangis Beijing, karena koh acong orang cine, bukan orang indie), nyang meninggal istrinye namenye veronica, name cinenye Bong kah an. “ pantes aje die nangis, karena sesame ini, modal usahe koh acong, dari istrinye. “ pikir minah. Minah tahu betul sejarehnye koh acong.
Begini ceritenye, nyang minah tahu tentang koh acong. Acong itu dulunye, imigran gelap dari cine, die datang ke Indonesia melalui medan, terus die ke jakarte. Di jakarte luntang lantung. Ketemu sama koh bong kar an, bapaknye bong kah an. Terus die dijodohin same anaknye, yang namanye bong kah an. Padahal acong ternyate ude punya anak bini, di cine sane, sempet ketahuan sama bong kah an. Cume ditutupin aje. Tapi istri acong, yang bername ida ang paw, disumpel-lin duit, tiap bulan same bong kah an, biar ngak ketahuan same babenye yang punye penyakit jantung. Sepande pande tupei melompat akhirnye jatuh juge, ibarat kate kaye borok diumpetin baunye, kecium juge. Bong kar an akhirnye, meninggal dunia, setelah tahu kelakuan acong sebenernye, jantungnye langsung kumat.
Nah, bong kah an juga meningeal dunie, karena kelakuan koh acong, nyang mau kawin lagi, same jande beranak due. Alasan-nye demi karier anaknye, nyang jadi pedagang, pengen jadi gubernur di jakarte. Entulah nyang bikin ribut terus dirumeh, sampe minah bosen ngedengernye. Padahal anaknye lagi maju daganganye, di tenabang. Makenye rada aneh juga bagi minah, bong kah an kuat ngadepin acong, nyang play boy, dan jago main sandiware, kalau nggak mau dibilang munafik.
Akhinye minah sibuk hari entu, nyiapin minuman dan makanan buat tamu. Nggak terase jam ude menunjukkan pukul 12 siang, Minah pingin pamit same ooh acong, sekalian minta duit gajinye. Namum ape yang terjadi jadilah…kun faya kun,,,Eng ing eng..jreng. Bagai disamber gledek berkali kali, minah malah di omelin koh acong, Alasan koh acong “ ngak elok lo, minta gaji di tengah gue lagi beduka, kurang etis tahu” kata kong acong marah. Sedangkan minah bingung, koh acong bisa bisanye ketawa ketiwi, ame si janda due namanye mey mey. Bahkan bisa-bisanye die selfie - selfie, sampe lupa bakar hio, buat sembayangin bong kah an.
Minah jadi bingung mau makan ame ape besok, pasalnye boro boro ngambil gajo, atau dipersen ooh acong, karena kerja berat, malah die di marahin. Dalam kaeadaan bingung pulang kerumah atawa die cari pinjeman ?, die berjalan mengikuti kaki melangke..
Bersambung ye…sholat subuh dulu ah..
kalu ada kemiripan cerite, maafin aje..ini fiksi belake.
Penulis adalah sekjen HSBI (Himpunan Seni Budaya Islam)