Oleh Helmi Adam
Koh Acong Main Curang, Gimane Nasib Minah ?
Setelah belanje di pasar, Minah masak dirumahnye, jam 2 udeh kelar, mereka bertiga makan siang. Minah, kemudian cerita ame anaknye, kejadian dipasar, sedetail detailnnye. Naim dengerin sampe melongo, sementare sadih berfikir, kaye baru kesambet aristoteles, “berarti bukan doa emak yang di terime, tapi sedekah emak yang diterime, kan ustadz somad bilang seratus kali lipet. jadi emak sedekah 5.000 dikali seratus. same dengan 500.000 “ kate Sadih yakin. Naim mendengar itu langsung aje nyerocos ” nggak bise bang, justru karena doa emak yang jadi sebab musababnye “ kate Naim menyanggah. “ Tapi Doa emak udeh lame nggak mujarab” kate sadih nimpalin. “inget nggak lo, waktu kemarin pala lo benjol, emak doa in elo nggak sembuh sembuh, pas dibawa kebdokter, baru sembuh” tambah sadih. “justru itu berkat doa emak, Naim bise di bawa kedokter” debat Naim menyangkal Sadih. Sadih jadi sewot, mau nimpalin lagi, tapi keburu Minah nengahin kaya wasit beneran, “Due duenye bener kate emak, lagian siape yang tahu rahasie Allah ? “ kate emak kepade kedue anaknye. “ Emak kenape nggak mihak ke Naim? Kan naim anak bungsu ?” keluh Niam. “Emak itu udeh bener im, jangan kayak KPU ame polisi deh, pake mihak mihakan segale “ kate sadih sembil senyum. “ huss sok tahu loh ah, kayak yang ngerti politik aje.” Kate emak sambil bebenah piring bekas makan mereka.
Tanggal 12 Juni 2019, hari genap, Minah pergi kerumah Acong mau pamit keluar kerja. Mendengar itu Acong marah bukan main. Apalagi minah. ngomong jujur, mau kerja di rumah koh Wowo. Makin mengkeleb aje koh Acong. Koh Acong nggak mau bayar gaji Minah, kalau Minah kerja di koh Wowo. Alesannye sederhane, Minah ude berkhianat dari koh Acong katenye. Tekad Minah ude bulat, dia mau keluar, apapun yang terjadi. Minah kemudian meninggalkan koh Acong yang uring uringan.
Di rumah koh Wowo, Minah langsung kerje, namun sebelum kerje, koh Wowo nanye ke minah, “ Lo ude ngomong berenti ame si Acong, min ? ” tanye Wowo negesin. “ Ude om Wowo, bahkan minah kasih tahu mau kerja di om Wowo” kate minah menjelaskan. “kenape lo manggil gue om ?” tanye koh Wowo bingung. “kan minah nggak boleh panggil koh, ame om wowo waktu di pasar” jawab minah ngingetin.” Iye tapi nggak useh panggil om juge kali” kate Wowo senyum.”Habis kalau Minah panggil Wowo aje nggak enak om, kalau Minah panggil tuan, pasti om Wowo marah, mendingan panggil om aje, biar akrab “ jelas Minah sambil senyum. “ya udeh terserah lo deh”, jawab koh Wowo. Selanjutnya Minah jelasin sacare detail, kenepe di keluar atawe berenti kerje dari koh Acong, bahkan gajinye, aje ngak di kasih. Koh Wowo dengerin dengan serius. “ude sekarang lo kerja aje, nyang bener, gaji lo gue kasih 1 juta tiap bulan, mudah mudahan cukup buat makan ye” kate om Wowo sambil masuk kamar.
Jam 11 siang tiba tiba rumah koh Wowo di gedor-gedor orang. Minah nyang lagi nyetrika sampe lompat, dan tuun ke bawah. Dia lihat, koh Wowo udeh buka pintu. Dan Minah penasaran ngelongok dari jendela. Ternyate koh Acong ame pak Erte nyang korup. Rupanye koh Acong, masalahin pindahnye Minah ke koh Wowo. Dan Pak Erte minta, koh Wowo mecat minah. “Ape dasarnye aye mecat Minah ?” tanye Wowo ke pak Erte, “berdasarkan survey dan Situng IT gue, Minah nggak disukain di kampung eni” kate pak Erte dengan yakin. “ Tunggu,.. situng IT tuh ape, pak Erte ?, kayak KPU aje “ tanye koh Wowo nggak ngerti. “ Situng IT, itu hasil survey itungan tetangge, jadi, gue ude hitung, mayoritas orang sini, nggak suka ame si Minah kerja ame ente wo” kate pak erte ngejelasin, percis kaya komisioner KPU jelasin hasil situng KPU.
Wowo bingung ape yag musti die pertahanin, karena pak erte berkuase. Saat itu ustadz Bachtiar lewat. “Ade ape nih ribut rebut” tanye ustadz bachtiar, koh Wowo pun menjelaskan, dari awal kejadian, hingga akhir. Akhirnye ustadz bachtiar ngomong ” Gini aje pak erte, kite bawa ke Majlis kerukunan Warge aje deh, sekalian hadirin tuh si minahnye” kate ustadz bachtiar dengan bijaksana. Mendengar itu koh Acong ame pak Erte jadi kasak kusuk. “ Gimane pak erte ? “ tanye koh Wowo. “ stuju “ kate Acong ame pak Erte..
Terus gimane nasib minah ? kite lanjutin ke Trilogi Sidang MK atawe Majlis Kerukunan…
Bersambung ye..ikutin terus ceritanye, yang jelas ini Fiksi belake..kalau ada kemiripan cuma kebetulan aje..
Penulis adalah Sekjen Himpunan Seni Budaya Islam (HSBI)