Trilogi Sidang MK bagian atu.
Kampret dan cebong ribut, Minah jadi merengut.
Oleh Helmi Adam
Gare gare minah, jadi rebutan antara koh Acong, dan koh Wowo, jadi heboh dikampung. Ade kelompok nyang mihak koh Acong, nyang disebut cebong, dan ade kelompok nyang mihak ke koh Wowo, nyang disebut kampret. Keduenye, punye argumen nyang seolah olah masuk akal. Kelompok cebong bilang, “Kalau Wowo membajak minah, dan nggak etis “, kalau kelompok kampret bilang, “Acong sadis, dan otoriter, karena minah punya hak menentukan nasibnye, emang minah budak”. Itu terlihat dari ribut- rilbut di We A group, twit-ter ame face book, ketike pemilihan calon, nyang akan duduk, buat ngadilin perkare Acong dan Wowo. Kelompok Acong ngajuin name calon, begitupun kelompok Wowo. Due duenye merase paling bener. Sayangnyenye, pak Erte yang harusnye jadi penengah, malah miring sebeleh, karena diempanin duit sama koh Acong.
Akhirnye diputuskan, mau di-ada-in pemilu raye dikampung, buat memilih 9 orang nyang pantes duduk di posisi hakim Majlis Kerukunan atawe MK bahasa kerennye. Minah jadi bingung, “Karena urusan pindah kerje aje jadi panjang “, pikir minah. Hal ini menyebabkan orang kampung terbelah due, kelompok cebong nyang dipimpin acong dan pak erte. Dan kelompok kampret nyang di pimpin wowo dan ustadz bachtiar. Loh kok Ustadz bachtiar jadi ikutan, padahal selama ini paling kalem. Hal e-ni dikarenakan ustadz bachtiar nyang ngusulin sidang MK, dan membuat Acong ame pak Erte kesel.
Pak Erte sempet merayu minah untuk kembali kerja di koh Acong, tapi ditolak minah. Lantaran pak erte dulu-lah yang pernah, nanda tanganin perjanjian nyang di tulis diatas batu, bahwa minah boleh keluar dari koh acong, kalau udeh kerja minimal 3 tahun, “nah, sekarangkan minah, ude kerja ame koh acong, lebih dari 3 tahun ?” kate minah kepada pak Erte, ngejelasin. Pak erte jadi bingung sambil mengusap air matenye, tapi minah ngak mau berubeh. Karena minah tahu airmate pak erte , airmata buaye.
Kontan aje acong dan pak erte berkoordinasi bahase keren-nye, padahal mah, cume rembukan ala mafie. Acong usul ke pak erte, buat ngedatengin perangkat erte, kerumah warge, atu atu, mendata warge, sebelum pemilihan.” Tapi ngak bisa gitu cong, entar ketahuan gue ngak netralnye,” kate pak erte. “ Tenang te, pokoknye elo gue modalin ame perangkat lo” kate acong, dengan gaye kaya bos besar. “ berape ? “ tanye pak Erte, pingin tahu.” Lima jute cukup nggak “ tanye Acong. Pak Erte nyang mendenger angka lime juta langsung kaget, karena selama ini, die dikasih duit ame Acong paling banter ratusan ribu. “bise ditambahin nggak “ tanye pak erte lagi. “ bise te, tenang aje, karena ude nyangkut gengsi gue,” kate Acong sambil ngeluarin duit. “ ini 7, juta lo pegang, satu hari e-ni, harus lapor ke gue kemungkinan menang atau kalahnye ye” tambah acong sambil tersenyum. Erte yang melihat duit tujuh jute, langsung aje disegreb, (mungkin orang sekarang ngak ngerti kata di segreb, disegreb entu artinye, diambil dengan hasrat seneng banget, bisa di peluk, bisa dicium De el el deh atawe dan lain lain deh)
Hansip Polkis disuruh ngedata warge same pak erte, dengan dikasih uang 500 ribu lansung aje seneng, langsung jalan, sedangkan hansip Teni, ngak ngejamin, dia bisa ngejalanin, masalahnye die takut dibilang ngak netral, ame warge. Istilah nye duit mau die terime, tapi kalau ngejalanin perintah pak erte, die agak malu malu kucing. Pak erte jadi sebel dan ngelaporin kelakuan hansip Teni ke koh A.cong. “Bloon lo te,” kate Acong, “Elokan erte, tinggal lo pecat aje, lo ganti ame nyang mau kerjasame, “ tambah Acong. Pak erte ngangguk aje kayak orang dicucuk idung. Maka diputuskanlah hansip Teni diganti, ame mantan calon besan nye pak erte, namenye Hadi. Hadi adalah tukang ngayal, dan Omdo alias ngomong doangibarat kate nih, omong nye gede, disaji ngak sampe sepiring.
Dalam waktu singkat, ketahuanlah ternyate, pendukung Acong lebih sedikit. Hanye 38 orang, sementara pendukung Wowo ade 62 orang. Minah tahu banget berita entu, karena si Hadi ngoceh ame Minah, minahpun lapor ame Wowo dan ustadz Bachtiar. Tapi sayangnye, Acong ude tahu duluan, jadi Acong ude pasang strtegi biar die tetep menang, calon hakim Majlis kerukunannye, di seleksi dulu ame pak erte, biar steril, kemudian dipilih lah 27 oarng calon, seleksian pak erte, dari calon entu cuma 3 orang yang ngedukung koh Wowo. Selebihnye ngedukung koh Acong.
Pemilihan dilakukan ame pak erte, tapi tibe tibe, jumlah orang kampung jadi bertambeh banyak, jadi 190 orang. “ Muke gile tuh si erte ame si acong “ kate ustadz bachtiar ketika dapet laporan dari jamaah. “Ude gitu pendatang barunye, gampang amat, di kasih KTP, ame pak erte, “ kate Doradong, jamaahnye ustadz Bachtiar. “Ude..kite tenang aje..kite baca doa aje…gue yakin doa adalah segalanye” kate ustadz bachtiar mimpin doa jamaahnye…
Bersambung ye..ane mau subuh dulu..
Kalau ade kemiripan cerite entu kebetulan aje, cuma mirip mirip doang.. ini kiseh fiksi
Kalau ade kemiripan cerite entu kebetulan aje, cuma mirip mirip doang.. ini kiseh fiksi
Penulis adalah Penasehat Forum Komunikasi Mahasiswa Betawi.