Oleh Helmi Adam
Sholat subuh
berjamaah baru aje kelar, Mpok Minah ngak sempet doa langsung cepet pulang
kerumahnye. Maklum, hari kemarin mpok Minah seneng banget, karena
dapet THR dari Bosnye. Padahal THRnya cuma 500 rebu, tapi bagi mpok
Minah, same aje kaya dapet duit berjute-jute. Sebab musababnye, mpok Minah
gajinya cuma 500 ribu, Jadi kalu dapet THR 500 ribu, entu artinye die dapet
satu bulan gaji bute.
Mpo Minah
ngepot kepasar, karena hari ini die musti masuk kerje kerumah bosnye nyang atu
lagi. Mpo Mineh adalah tipikal jande gesit en segreb, dia kerje di due pintu.
Hari ganjil, die kerje di tempat Koh Acong, sedangkan hari genep, die kerje
dirumahnye om Ami, percis kaye mobil ganjil genapnye pemda DKI. Hari ini adalah
hari ganjil, makanye die harus kerje dirumah Koh Acong. Bedanye
kalau di rumah koh Acong die masuk jam 7 pagi dan pulang harus jam 12 siang,
kalu di rumah Om Ami, dia pulang selesainye die kerje. Biasenye jam 10 die udeh
pulang, maklum Om ami punye due Asisten rume tangge, nyang satu
tukang cuci, satu lagi, yaa die kendiri, tukang beberes. Tapi soal
gaji same 500 rebu.
Matahari
belum juge muncul, mpok mineh udeh mandi, dan siap “lets go”. ke pasar pamulang
mas, yang terkenal lebih mureh, buat belanje lebaran.
Sebelum berangkat, die catet dikepalannye ape aje, nyang die mau
beli, mulei dari daging sekilo, beli ayam atu ekor,
hingge beli ikan gurame atu ekor.
Namun pas
sampe di pasar semuanye buyar, kaye di film End Gamenye Marvel, mpok Minah jadi
ngak semangat, persis kaye Thor nyang tambun. Usut punga usut rupanye, karena
harge hargenye naik semue, Dari daging ayam hingga sembako, bahkan naiknye ngak
kire kire. Bayangin aje masa kemarin daging harganye 130 ribu sekilo, sekarang
udeh 150 ribu sekilo, padahal nyang mpok Mineh denger di TV harga daging cume
80 ribu. Waktu mpok Minah protes same ntu tukang daging,, eh mpok Minah malah
disuruh beli di TV aje,..”Sue betul ye” ucap mpok Minah dalam hatinye.
Dan mpok
Minah jadi kayak kurang dareh. Namun ketike die inget Si Naim en Sadih, Bueh
hatinye yang paling die sayang, langsung deh, die semangat lagi, kaye kapten
Amerika habis ketemu same Ant Man.. lagi lagi mirip di film End Game, maklum
aje ye,..penulisnye senang nongton filmnye Marvel.
Dengan
semangat 45 mpo mineh puter otaknye, Gimana carenye makan enak di hari
raye, apelagi bocahnye mpok mineh due duenye Abege, nyang makan-nye
banyak. Akhirnye mpok mineh atur strategi ala Jurgen klopp, pelatih
bolanye Liverpool nyang ngejurain liga champion.. Mpok mineh mutusin
buat beli ntu makanan tapi kuahnye, die mau dibanyak-kin. Untuk rendang,
mpok mineh beli daging redang seperempat kilo dan beli kentang serta kacang
polo setengeh kilo, total belanje habis 120 ribu, terus die beli bumbu rendang
20 ribu. Ngak lupe die beli ayam cacat buat opor. Ayam cacat istilah
orang betawi Pamulang, karena cuma setengeh ekor aje, jadi cacat die punye kaki
ame pahe cuma atu doing. Total harga 40 ribu, plus bonus bumbu opor.
Habis ntu die beli tahu dan tempe 20 ribu. Saat mau pulang die lihat
ikan gurame, tapi karne harganye mahal,tepakse deh die PeA We (istilah di DPR
nye Pergantian antar waktu), tuh ikan gurame diganti sama ikan peda, same
jagung dan pete, totalnye habis 80 ribu.
Alhamdulillah
meski ngak sesuai dengan cite cite reformasinye mpok Minah, tetapi masih bisa
beli nyang die mau. Total belanje jadi 280 ribu, Dan sise uang masih ade
220 rebu,. Terus Mpok Mineah cepat cepat beli beras, minyak, dan gas. Gas
harganye 45 Ribu, beli beras 5 kilo, harganya 65 ribu, dan beli minyak
goreng 14 rebu. Total habis yang dibelanjain mpok Minah 124 ribu, sise
uang ditangan tinggal 96 ribu. Namun sialnye, sampe di rumah ditagih uang
sampah ame keamanan di kampungnye, die kudu bayar 50 rebu sebulan.
Sisa uang THR mpok Mineh jadi tinggal 46 rebu, eh sialnye lagi, pulsa
listriknya habis, mpok Minah terpaksa beli pulsa listrik 40 rebu, dan sisa
duit tinggal 6 ribu.
“Cukup ngak
ye buat makan seminggu” tanye mpok mineh dalem ati. Sambil senyum, inget
gajinye yang belum diambil di koh Acong.
Pasalnye
gaji mpok Minah nyang lime rates rebu dari Om Ami, ude dibayarin
buat kontrakan rumah 400 rebu, dan seratus rebu dipakai buat beli sabun, odol,
shampoo, obat ketek alias deodoran dan sirop. Mpok Minah bingung lebaran
hanya menyisakan uang 6 ribu aje.tapi hatinye masih tenang, pasalnye, hari ini
die dapet gaji dari koh acong 500 rebu..die lihat jam di rume ude jam 7,”
waduh gawat, bisa diomelin koh acong nih” ngedumel dalam hatinye.. Mpok Minah
pun crept cabut, kalang kaput, laksana motor butut bang dull, nyang bengek,
ngos ngosan..
Jam 7. 15
menit, mpok Minah sampe di rumah koh acong, padahal kalau jalan biasa, butuh
waktu 25 menit dari kontrakan. Malang ngak bise ditolak, koh acong naruh surat
di depan pagernye rumahnye. Mpok Mineh dengan ngos ngosan, karena habis lari
kaya sprinter, kaget dapetin rumah koh acong kosong, dan hanye ade surat di
depan pagernye, dan mpok Minah baca surat ntu yang bertuliskan "Buat Minah".
Mpok Minah seneng banget, karena die pikir pasti itu amplop isinye uang gajinye
yang belum dibayar. Namun sayang beribu kali sayang kaye lagu lamenye Titik
Puspa, isinye ternyate cuma selembar surat doang, padahal Minah udeh perikse
dengan teliti, takutnye ade duinye, tapi cuma selembar certes nyang bertuliskan
” minah gaji lo, gue bayar minggu depan, karena gue liburan seminggu sama
keluarga. Habis lo gue tungguin, telat sih “ langsung aje minah lemes, pasalnye
lebaran masa megang duit cume 6 rebu… cukup ngak ye..Jreng..
Mpok Minah
yang lemes dari rumah koh Acong, bingung mau ngapain akhirnye die putusin untuk
masak rendang ame opor pagi itu. Hampir empat jam die masak akhirnye mateng
juga, tepat jam 3 sore. Mpok Minah kemudian sholat ashar, habis ntu die kembali
kedapur, ngolah ikan Peda, maklum hari raye ude tinggal besok. Sambil
senandung, nyanyi lagu sholawatan-nye wali, mpok Minah masak ikan pedanye. Naim
en Sadih langsung ke dapur, Mpok minah ke ge-er-an, sambil ngomong ame Sadih
dan Naim, “kenape lo kemari ? pasti denger suara emak lo nyanyi ye ..eanak ngak
?, Tanya mpok Minah ame Naim. Sambil nyium wanginya ikan Peda.. “em enak banget
mak” kate Naim, Emak seneng banget dengernye. “emang suara emak enak di denger,
kalau emak masih mude, ude masuk dapur rekaman” kate Minah. Naim nyang
ngedengirin emaknye ngoceh ngak karuan kesel, “ Maksud Naim tuh, ikan Pedanye
yang enak, bukan suara emak yang fales” ucap Naim sambil tersenyum. Minah yang
tadinye melayang langsung melengos kesel. Melihat itu, Sadih jadi ikut
ngomentarin komentarnye Naim.
“
sotoy luh, “ kate sadih sembari kejulek adenye. “emang lo ude rasain, kan elo
Puase” tambeh sadih. Minah denger itu, jadi semengat buat ngejatuhin Naim,
“bener tuh kate abang loh, Sotoy luh…suara emak di bilang Fales” kate Minah
seneng. Sadih yang mendengar jawaban emaknye langsung ngomong, “ emak
ngak nyambung, Sadihkan ngomong masalah ikan Peda bukan suara emak, suare emak
sih emang bener fales” kate Sadih dengan muka serius. Mpok Minah kontan aje
ngusir mereka berdua dari dapurnye.
Waktu
menunjuk-kan jam 17.30, Sadih, Naim dan minah duduk depan meja makan nyang udah
siap ngidangin masakan minah. Namun saat itu, kedengaran suara orang ngucapin
asalamualaikum, minah ame anaknye langsung aje jawab, “ walaikum salam”. Minah
pun nyuruh sadih buka pintu. Ternyata yang datang mantan mertuanya minah, kong
Amin dan tige anaknya yang laki laki. Minah pun langsung nyambut kong amin.
Kong Amin nyang ude kawin lagi same perawan usia 30 tahunan, Nyang baru datang,
ngelihat hidangan, langsung aje duduk di meja makan ame anak tige anaknye. “
enak nih masakan lo kayanye Min” kate kong Amin. Minah dengan bangga
Bilang, “ ah biasa aje kong, silahkan nanti dicobain
pas buka kong”.
Sadih dan
Naim langsung aje pasang muka kesel, pasalnye pasti dia baru bisa makan,
setelah Kong Amin makan. Ngelihat gelagat ngak enak Minah nyuruh Sadih ame Naim
masuk kekamar bawa teh manis buat buka. Adzan pun berkumandang kong Amin dan
anak anaknye, langsung aje makan makanan yang disedia-in Minah. Mereka nampak
lahab banget kaya orang belum makan sebulan, semuanye di cobain. Minah yang
memperhatikan mereka makan agak khawatir. “ ya die ambil daging atu atunye
sisa, masya allah rendang ame opor gue habis deh..” dalam ati Minah sambil
senyum terpaksa dihadapan bekas mertua.
Didalam
kamar Sadih dan Naim, ngintip kong amin nyang lagi makan, die bedue berdoa
supaya makanan ngak habis. “ ya..ya..ikan pedanye diambil juga kak” kate naim
sambil berderai airmatanye. Sadih yang ikut ngintip bilang ke Naim, “ ude
jangan nangis masih ada satu ikan peda lagi” kate sadih,,,Namun baru aje sadih
ngomong begitu, salah satu anaknye kong Amin mau ngambil ikan peda , cuma kalah
cepet sama minah yang ambil duluan, dengan alasan mau cobain, karne dia suka
ikan peda. Sadih dan Naim pun berdua langsung lega..
Kong Amiin
dan anak anaknye selesai makan, kemudian die ijin pulang, pengin ke masjid.
Sebelum pulang, die panggil Naim ame sadih, dua duanye dikasih amplop buat
lebaran katenye. Naim dan sadih pun senengnye bukan main, karene sejek bujeg,
baru kali ini engkongnya gnash tanggokan, buat ledarna, ame die berdua. padahal
Kong amin biasenye pelit be-eng. Setelah ngasih amplop Kong Amin langsung pamit
pulang. Sambil ngomong sama minah “ tuh gue kasih amplop, buat anak lo berdue,
nanti jangan lupa pilih gue ye, jadi Rt di kampung ini “ kate engkong sambil
senyum ganjen, kayak anak milenial. “asalamu alikum” ucap kong Amin pamit,
sambil ngeloyor pulang same ketige anak anaknye..
Minah pun
seneng, ngelihat muka anak anaknye seneng, sambil ngomong, “ Tuh kan, makanan
kite habis, tapi engkong loh baik die kasih tuh lo duit, nope nope..”.sadih ame
Naim pun kaget, “kok emak tahu kite masing masing dapet due ratus
rebu, kan duitnye masih dalem amplop” kate Naim. “lah kan kelihatan ada dua
lembar, lo pehatiin aje” kate emak sambil senyum. “ tapi bisa aje mak, duitnye
lima puluh ribuan due, jadi cuma seratus ribu” kate sadih nimpalin. “Ngak
mungkin” kate emak, “ karene kalau duit lima puluh ribuan lebih lebar, lebih
gede” kate emak lagi nambahin.
Naim jadi
penasaran akhirnye die robek ntu amplop dan terbukalah..Jreng.. Sadih, Naim ame
Minah kaget melihat isi amplop….
Naim jadi
penasaran akhirnye die robek ntu amplop dan terbukalah..Jreng.. Sadih, Naim ame
Minah kaget melihat isi amplop Ternyate benar dugaan Minah, ade due lembar duit
kertas, Nyang bikin kaget mereka bertige adalah lembaran duit kertasnye,
ternyate cume secengan alias seribuan dua lembar, jadi mereka cuma dapet
sa-ceng alias 4 ribu. Minah mau nangis di depan anaknye, tapi die malu, karena
modal masaknya aje 280 ribu. Besar pasak dari pade tiang, rugi Minah…(mungkin
ini asal usulnye kate kate rugiiii minaaah..)
Bukan Minah
janda pamulang, kalau ngak kuat, dan ngak punya akal ngatasin yang beginian,
pikir Minah. Die pun ambil duit empat ribuanya, dari tangan anak anaknye, “nih
4 rebu, emak tambahin t seribu, lo beli perban kasa ye” suruh Minah dengan muka
serius. Sadih dan Naim yang mendapat perintah emaknye saling pandang kemudian
berdue kayak paduan suara koor, mereka berdue ngomong “ Buat ape mak ? ”
Tanyanye. “udeh lo pergi aje sane, lo mau makan ikan peda nyang emak sisain
buat lo, ngak ?” Tanya Minah mantap. Sadih dan
Naim langsung nganguk, kayak ayam kena sirep, dan mereka berdue cepet pergi,
Minah pun
merapihkan meja bekas makan kong Amin dan anak anaknye. Ivan peda atu atunye
diangetin Minah, sambil nambahin kuah jagung dan petenye. Masakan dalem sekejep
selesei dihidangin di meja makan. Sadih dan Naim lari ngos ngosan masuk kerumahnye
bawa perban kasa. Minah pun sudah duduk dengan manis, “ Mane Perbanye” Tanya
Minah, Sadih dan Naim nyodorin perbanye ame Minah. Mereka langsung duduk aje,
di meja makan siap mau makan ikan peda atu atu. “Eit Jangan makan dulu” larang
minah ame kedua anaknye. “ lo berdua sholat magrib dulu!” pinta Minah, ame
Sadih an Naim.
Naim an
Sadih cepet cepet masuk kamar buat ngerjain sholat, sedangkan Minah ngambil
perbannye, dan ngebungkus ikan peda pake perban kasa, kaya tuh ikan habis
kecelakaan berat aje. Sadih an Naim yang ude selesai sholat duduk di meja makan
kaget. Due due duenye ngelihat ikan Peda diperban, “Kenape ikan Peda di perban
mak ? emang habis kecelakaan dimane ? “ Tanya Naim dan Sadih beruntun. Minah
naris napas, kemudian die ambil nasi ame tangannye sekuncup, Dia
cocol cocol nasi ditanganye ke arah ikan peda yang diperban. Terus die
masukin tuh nasi kemulut nye yang kecil, sementare Sadih dan Naim melihat
sambil melongo. “ Emh. enak ikan Pedanye masih berase” kate Minah sambil ngunyah
nasinye.
Naim protes
ke minah kayak emak emak militant gayanye ” terus Gimane biar Naim bisa makan
dagingnye ? “. Sadih juga ikutan protes, dengan gaya mahasiswa sekarang yang
loyo, karena kebanyakan sogokkan. “iye mak, gimane ye ?” . Minah dengan tegas
ngomong, “ denger ye, lo bedue, duit emak tinggal lima rebu, emak baru dapet
duit lagi enti, minggu depan, jadi kite harus irit irit makan ikan peda, kite
cocol-lin aje dah tuh ikan, mudeh-mudehan seminggu cukup buat kite makan” kate
minah ngeejelasin kondisi sebenernye, Habis mau gimana lagi ?, minah udah habis
akalnye. Naim dan Sadih hanye nunduk lesu, dan makan ape adenye. Nyocolin ikan
peda sekuat tenage, agar tu daging nempel di nasinye. Minah pun sedih..habis
mau gimana lagi ancuur Mineh…(mungkin itu sejarahnye kate kate "Ancur
Mineh", gara gara gara ikan Peda diperban)
Bersambung
ke Trilogi Ancur Minah habis lebaran ye…bocoranye tentang Minah mau ambil
gajinye ke koh Acong..